2025-mi atualinnginnermi ulluunerani neqeroorutit, kommunini kisitsisit pingaarnerit

2025-mi qaammat januaarimi meeqqat 3.595-it pisortat atualinnginnermi ulluunerani neqeroorutaanniittarput, taakkunannga meeqqat 0,5-inik ukiullit 196-it, 1-inik ukiullit 617-it, 2-nik ukiullit 648-t, 3-nik ukiullit 656-it, 4-inik ukiullit 731-t aamma 5-inik ukiullit 747-t. Taamaasilluni meeqqat 3-5-inik ukiullit tamakkerlutik 90,3 pct.-ii atualinnginnermi ulluunerani neqeroorutaaniittarput. Meeqqat ulluunerani neqeroorutiniittartut annertussusaasa takutippaat innuttaasut akornanni meeqqat taaneqartunik ukiullit qanoq amerlatigisut atualinnginnermi ulluunerani neqeroorutiniittarnersut.

 

Titartagaq 1. Najugaqarfinni meeqqat atualinnginnermi ulluunerani paarineqartartut annertussusaat

Najoqqutaq: https://bank.stat.gl/OFNUKN1

 

Pisortat atualinnginnermi ulluunerani neqeroorutaanni sulisut

2025-mi pisortat atualinnginnermi ulluunerani neqeroorutaanni piffissaq tamakkerlugu sulisutut atorfillit 1.089-iusimapput. Atualinnginnermi ulluunerani neqeroorutini sulisut tamakkerlutik arnanik sulisoqakkajunnerupput, 2025-milu arnat piffissaq tamakkerlugu sulisut 1.055-iusimapput angutillu piffissaq tamakkerlugu sulisut 34-usimallutik.

 

Paaqqinnittarfinni sulisut eqimattanut tallimanut agguaassimapput: Pisortanut, perorsaasunut, perorsaanermi ilinniarsimasunut, perorsaasunut ikiortinut aammalu igaffimmi eqqiaanermilu sulisunut. Pisortat aammalu igaffimmi eqqiaanermilu sulisut tapersersuisutut/ikorfartuisutut sulisunik taaneqarsinnaasut sulisut tamakkerlutik 20,3 pct.-iinik annertussuseqarput. Perorsaasut, perorsaasutut ilinniarsimasut aammalu perorsaasunut ikiortit tamarmik meeqqanut paaqqinnittutut sulisunik (meeqqerisutut) naatsorsorneqarput. 2025-mi meeqqerisut 14,6 pct.-ii perorsaasutut sulipput, 29,1 pct.-ii perorsaanermik ilinniarsimasuullutik aammalu 56,2 pct.-ii perorsaasunut ikiortaallutik.

 

Titartagaq 2. 2025-mi meeqqanut paaqqinninnermik sulisut, amerlassusaat pct.-inngorlugillu annertussusaat

Najoqqutaq: https://bank.stat.gl/OFNUKN1A

 

Meeqqerisumut ataatsimut meeqqat amerlassusaat

Meeqqat ukiuini agguataarsimasuni assigiinngitsuni sanilliunniarlugit aammalu meeqqat meeqqamut paaqqinnittumut ataatsimut kisinniarlugit meeqqat amerlassusiisa uuttuutaannik kisitsisoqarpoq. Periaatsip immikkoortuani taaguut annertunerusumik nassuiarneqarpoq. Tunngaviusorli tassaavoq meeraaqqerivimmiittoq ataaseq 1,67-inik meeqqat amerlassusaannut uuttuuteqartoq, meeqqerivimmiorlu ataaseq aamma meeqqat amerlassusaannut 1-imik uuttuuteqarluni. 2025-mi nuna tamakkerlugu meeqqat amerlassusiisa uuttuutaat meeqqerisumut ataatsimut agguaqatigiissillugu 5,3-iusimavoq. Meeqqat meeqqerisumut ataatsimut amerlassusaannut meeqqat sulisullu akornanni pissutsit apeqqutaasarput, assersuutigalugu amerlassusaannut kisitsit annikippat meeqqat ikinnerunerannik imaluunniit sulisut amerlanerunerannik peqquteqarsinnaavoq.

 

Titartagaq 3. Atualinnginnermi ulluunerani neqeroorutini meeqqerisumut ataatsimut meeqqat amerlassusaat, najugaqarfik malillugu

Najoqqutaq: https://bank.stat.gl/OFNUKN1A

 

Meeqqanut sulisunullu naatsorsuutit tamakkerlugit

Tabel 1-imi meeqqat amerlassusaat aamma piffissaq tamakkerlugu sulisut suliaqarfinnut kommuninullu immikkoortiterlugit naatsorsorneqarput. Taamatuttaaq kisitsisaataasivimmi najugaqarfiit aamma neqeroorutit suussusaat malillugit kisitsisit takuneqarsinnaapput.

 

Tabel 1. 2025-mi meeqqat ukiuinut tulleriaarneri aammalu sulisut, kommunit malillugit

	Katillugit	Kommune Kujalleq	Kommuneqarfik Sermersooq	Qeqqata Kommunia	Kommune Qeqertalik	Avannaata Kommunia
Ulluunerani neqeroorutinniittut ..........	3.583	386	1.498	675	354	670
0,5-inik ukiullit .......................	196	15	91	41	15	34
1-inik ukiullit .........................	617	60	252	117	78	110
2-nik ukiullit .........................	648	69	254	124	64	137
3-nik ukiullit .........................	656	79	286	130	52	109
4-inik ukiullit .........................	731	85	315	123	57	151
5-inik ukiullit .........................	735	78	300	140	88	129
Aqutsisut ...........................	72	8	25	16	10	13
Perorsaasut .........................	127	11	62	17	10	26
Perorsaasutut ilinniarsimasut ...........	253	31	87	54	25	56
Perorsaasunut ikiortit ..................	488	33	197	100	52	105
Igaffimmi eqqiaanermilu sulisut ..........	149	22	57	20	18	31
Piffissaq tamakkerlugu sulisut katillugit ....	1.089	106	429	207	116	232
Meeqqat amerlassusaat ...............	4.557	482	1.896	863	459	857
Meeqqerisut akornanni perorsaasut (pct.) ..	14,6	15,3	17,9	10,1	11,6	14,0
Meeqqeris. ataatsi. meeqqat amerlassusaat	5,3	6,4	5,5	5,0	5,2	4,6

Nalunaarut: Meeqqat 5-inik ukiullit pisortanit ulluunerani neqeroorutiniittut ilaanngillat.

Najoqqutaq: https://bank.stat.gl/OFNUKN1A